Í dag mættum við sigurvegurunum frá því í fyrra G-Team Novy Bor fra Tékklandi. Meðalstig þeirra eru 2696 og þeir stilltu upp sínu sterkasta liði með Wojtaszeka á fyrsta borði, Navara á öðru borði, Harikrishna á þriðja borði, Laznicka á fjórða borði, Sasikiran á fimma borði og Hracek á sjötta borði. Hracek er að vísu varamaður en tveimur stigum hærri en sá sem er skráður á sjötta borð og hvíldi hjá þeim svo það skiptir engu máli hvor þeirra var inn á.
Það var greinilea ekkert vanmat þar á ferðinni og ég fann að viðhorf þeirra til viðureignarinnar var allt annað en rússanna í annarri umferð. Þeir ætluðu sér að vinna þessa viðureign örugglega og voru tilbúnir að hafa fyrir því. Þad fór líka svo að þad var aðeins Gawain á fyrsta borði sem náði jafntefli. Hann sigldi jafnteflinu örugglega í höfn þótt hann væri með svart og fengi þrengri stöðu út úr byrjuninni.
Staðan hjá Robin á móti Navara var athyglisverð, hann var með meira rými en kóngsstaðan opin. Í slíkri stöðu gegn manni með yfir 2700 stig þýðir ekkert að gera mistök. Ein yfirsjón hjá Robin og Navara óð í gegn með nokkrum hnitmiðuðum leikjum og vann öruggglega. Þröstur, Einar Hjalti og Magnús voru vélaðir niður í rólegheitum. Hlídar tefldi sína þröngu stöðu gegn Sasikiran af öryggi. Sasikiran fór hægt í sakirnar í byrjuninni og Hlíðri tókst að losa vel um sig og fær færi á að jafna a.m.k. taflið en missir af þeim möguleika og tekur í framhaldinu ákvörðun um að gefa tvo hróka fyrir drottningu og þarf að tefla áframhaldið mjög nákvæmt. Þad tekst lengi vel að þræða einstigið en í 38. leik þegar tíminn var farinn að minnka hjá báðum keppendum leikur Hlídar Dg5 og fær tapaða stödu í framhaldinu. Réttur leikur var 38…Dh4 med tvöfaldri hótun Dxf2 og f4. Staðan er áfram jafntefli en leikar hefðu snúist og Sasikiran hefði þurft að þræða einstigið.
Með tapinu í dag fórum við í 7.-15. sæti og fáum á morgun í lokaumferðinni Minsk frá Hvíta Rússlandi sem var raðað í 15. sæti skv. syrkleikaroð. Sú sveit hefur þann kost að vera með fjóra stórmeistara og engan varamann þannig að Einar Hjalti er kominn með GM áfanga hvernig sem fer á morgun sem segir allt um árangur hans á mótinu til þessa. Þeir eru aðeins stigahærri en við en munurinn í heildina lítill. Við sýndum þad gegn Haladas frá Ungverjalandi að við getum alveg fengist við svona sveitir. Umferðin á morgun byrjar kl. 14 og við verðum á borði 7 og í beinni útsendingu eins og í siðustu tveimur umferðum. Vigfús Ó Vigfússon
