Smári efstur á fjölmennustu skákæfingu Goðans frá upphafi

Smári Sigurðsson varð efstur á mjög fjölmennri skákæfingu sem fram fór á veitingastaðnum Hlöðufelli á Húsavík í gærkvöld. Smári fékk 6,5 vinninga af 7 mögulegum, Rúnar Ísleifsson varð annar með 5,5 vinninga og Adam Ferenc Gulyas þriðji, með 5 vinninga. Tímamörk voru 10+2 og voru tefldar 7 umferðir.

Alls mættu 20 keppendur til leiks á æfinguna sem er met í 19 ára sögu Goðans. Gamla metið voru 12 keppendur þannig að það var slegið með miklum glæsibrag í gærkvöld. Alls mættu 6 nýir skákmenn á æfinguna auk þess sem mjög góð mæting var hjá öðrum félagsmönnum. Franceco Perini og Tsakopiakos Angelos náðu bestum árangri af nýliðinum og lönduðu báðir 3 vinningum.

Mótið á Chess-manager (Ath: Steve Whiting tefldi ekki síðustu tvær skákirnar og Benedikt Þorri tefldi bara 2 skákir)

Vegna mikillar þátttöku á æfingunni, sem átti að vera lokaæfing vetrarins, er verið að vinna að því að bæta við æfingum í maí til að svala skákþorstanum sem blossað hefur upp sl. daga á svæðinu. Niðurstöðu úr því er að vænta fljótlega.

Hér fyrir neðan er hægt að skoða nokkrar myndir sem teknar voru í gærkvöldi.