Smári Sigurðsson og hinn ungi og stórefnilegi sonur hans Kristján Ingi Smárason, eru efstir og jafnir með 3,5 vinninga á Skákþingi Hugins á Húsavík sem nú stendur fyrir. Hermann Aðalsteinsson og Rúnar Ísleifsson koma næstir með 3 vinninga hvor, þegar 5 skákum er ólokið í mótinu. Mótið má skoða hér á chess-results
Smári, Hermann og Rúnar eiga eftir tvær skákir hver og úrslit gætu ráðist á morgun þegar Smári teflir við Rúnar og Kristján Inga. Takist Smára að vinna báðar skákirnar tryggir hann sér titilinn. Gangi það ekki eftir eiga Rúnar, Kristján Ingi og Hermann möguleika á titlinum. Ekki liggur fyrir á þessari stundu hvenær síðustu þrjár skákirnar fara fram.
Taflmennska hins 10 ára gamla Kristjáns Inga Smárasonar hefur vakið athygli á mótinu. Hann vann Sigurbjörn Ásmundsson og Ævar Ákason, hélt jöfnu með svörtu mönnunum gegn Hermanni, en varð að játa sig sigraðan gegn Rúnari Ísleifssyni. Kristján á einungis eftir að tefla við Smára Sigurðsson föður sinn og verður það ein af úrslita skákunum í mótinu.
Kristján Ingi fulltrúi Íslands á Norðurlandamótinu í skólaskák.
Helgina 14-18. febrúar fer fram Norðurlandamótið í skólaskák í Borgarnesi og hefur Kristján Ingi Smárason verið valin sem annar af tveimur fulltrúum Íslands í flokki 10 ára og yngri. Þar mun hann etja kappi við bestu skákmenn frá hinum Norðurlöndunum í hans aldursflokki og verður afar spennandi að fylgjast með gangi hans á mótinu. Fyrirfram er Kristján metinn sjötti sterkasti í sínum flokki samkvæmt skákstigum af 12 keppendum.
Kristján Ingi Smárason er, svo best er vitað, fyrsti Þingeyski skákmaðurinn til að taka þátt í Norðurlandamótinu í skólaskák og má búast við frekari afrekum hjá honum á skáksviðinu í framtíðinni.
Hér er hægt að skoða keppendalista Norðurlandsmótsins.
